Կրեմլը համաձայն է Լուկաշենկոյի հետ. ըստ Պեսկովի՝ ԱՄՆ-ՌԴ-Ուկրաինա բանակցությունների լավագույն վայրը Մինսկն է

Ռուսաստանի, Ուկրաինայի և ԱՄՆ-ի հնարավոր եռակողմ բանակցությունների հարցը դեռ չի քննարկվել, սակայն Կրեմլը Մինսկը համարում է դրանք անցկացնելու լավագույն վայրը։ Այս մասին ճեպազրույցում ասել է ՌԴ նախագահի մամուլի քարտուղար Դմիտրի Պեսկովը՝ մեկնաբանելով Ալեքսանդր Լուկաշենկոյի առաջարկը՝ Բելառուսի մայրաքաղաքում խաղաղ բանակցություններ կազմակերպել Դոնալդ Թրամփի, Վլադիմիր Պուտինի և Վլադիմիր Զելենսկու միջև։ «Այս հարցը ոչ մի կերպ չի բարձրացվել, չի քննարկվել։ Բայց, իհարկե, մեզ համար Մինսկը լավագույն վայրն է։ Սա մեր հիմնական դաշնակիցն է, ուստի սա լավագույն տեղն է բանակցությունների համար»,- Կրեմլի ներկայացուցչի խոսքերն է մեջբերում Interfax-ը։ Պեսկովը նաև նշել է, որ Կրեմլը «դրական» է վերաբերվում բանակցություններին Վլադիմիր Զելենսկու պատրաստակամությանը, ինչի մասին ավելի վաղ հայտարարել էր Դոնալդ Թրամփը ԱՄՆ Կոնգրեսին ուղղված իր ուղերձում։ «Հարցն այն է, թե ում հետ նստել բանակցությունների սեղանի շուրջ։ Առայժմ ուժի մեջ է մնում Ուկրաինայի նախագահի՝ ռուսական կողմի հետ բանակցություններ վարելու իրավական արգելքը։ Ուստի, ընդհանուր առմամբ, մոտեցումը դրական է, բայց նրբությունները դեռ չեն փոխվել»,- հավելել է Պեսկովը։